Сайт бояуы
Әріп арасындағы қашықтық
Суреттер

Халықаралық қызмет


26.11.2020

ҚХР Парламентінің Спикері: Тұңғыш Президент Назарбаев - халықаралық қоғамдастықтағы беделді саясаткер

Нұр-Сұлтан, 26 қараша, Мәжіліс үйі. Қытай Халық Республикасы Бүкілқытайлық халық өкілдері жиналысы Тұрақты комитетінің төрағасы Ли Чжаньшу Қазақстанның Тұңғыш Президенті Нұрсұлтан Әбішұлы Назарбаевтың халықаралық деңгейдегі жоғары беделін және оның еліміздегі тарихи рөлін атап өтті. Конференция қатысушыларына сөз арнаған Ли Чжаньшу Тұңғыш Президент, Елбасы Нұрсұлтан Назарбаевтың мемлекетті қалыптастыру, оның саяси жүйесін жетілдіру және тұрақтылықты қамтамасыз ету жолындағы ерен еңбегіне тоқталды. -«Тұңғыш Президент Назарбаев - халықаралық қоғамдастықтағы беделді саясаткер болумен қатар, қытай халқының тілеулес досы ретінде ұзақ уақыттан бері қытайлық-қазақстандық тату көршілік және достық ынтымақтастықты нығайтып, Қытайда жоғары беделге ие болып келеді» - деді Қытай Парламентінің Спикері. Ли Чжаньшу қос ел арасындағы парламентаралық өзара іс-қимыл деңгейін жоғары бағалап, оның екі ел халқына да тиімді екеніне тоқталды. Сонымен қатар Тұрақты комитеттің төрағасы ҚХР Бүкілқытайлық халық өкілдері жиналысының Қытай мен Қазақстан арасындағы стратегиялық әріптестік жан-жақты дамыту мақсатында ҚР Парламенті Мәжілісімен ынтымақтастықты тереңдетуге дайын екендігін жеткізді.

26.11.2020

Н.Нығматулин: Тұңғыш Президент қазақстандық парламентаризмнің негізін қалады

Нұр-Сұлтан. 26 қараша. Мәжіліс үйі. Бүгін Нұр-Сұлтан қаласында «Елбасы Н.Ә.Назарбаевтың Қазақстандағы парламентаризмнің қалыптасуы мен дамуындағы рөлі» атты халықаралық конференциясы өтуде. Дәстүрлі форумды форумды алғысөзбен ашқан Мәжіліс Төрағасы Нұрлан Нығматулин Қазақстанның Тұңғыш Президенті Нұрсұлтан Әбішұлы Назарбаевтың тәуелсіз Қазақстанымызды және оның парламентаризмін қалыптастыру жолындағы теңдессіз рөліне тоқталды. Мәжіліс Төрағасы атап өткендей, Елбасымыз елімізді барлық қиындықтан аман алып шығып, ірі саяси, экономикалық әлеуметтік реформалар жасады. Мемлекетімізді әлемдік деңгейге жеткізді. «Қазақстандық даму жолы» қалыптасты. Сондықтан, шын мәнінде, «Тәуелсіздік жолы ол Елбасы жолы». Осы даму жолымыз қазір Президент Қасым-Жомарт Тоқаевтың басшылығымен одан әрі жалғасуда. Осы үлкен жолда тәуелсіздік тарихымен бірге келе жатқан қос палаталы Парламенттің де үлесі зор екенін баса айтқан Нұрлан Нығматулин: Бүгінде біздің кәсіби Парламент қоғамдық пікірлер мен ашық саясаттың биік орны болумен қатар, мүмкіндігі мол, қуаты мықты, жоғары заң шығарушы органға айналды. Өзіне жүктелген, әрбір міндетті абыроймен атқарып, Елбасы Нұрсұлтан Әбішұлы Назарбаевтың және Мемлекет Басшысы Қасым-Жомарт Тоқаевтың маңызды қадамдарын, саяси, экономикалық, әлеуметтік бастамаларын сапалы заңдармен қамтамасыз етіп келеді, -деді. Сонымен қатар палата Спикері Қазақстан Парламентінің өркениетті елдердің заңнамалық органдарымен тең дәрежеде қызмет етіп, Елбасымыз айтқандай, нағыз демократия мектебіне айналғанын жеткізді. Нұрлан Нығматулиннің пікірінше осының барлығы, Тұңғыш Президентіміз Нұрсұлтан Әбішұлы Назарбаевтың ел басқарудағы дана, көреген, сындарлы саясатының жемісі. Мәжіліс Төрағасы бүгінгі таңда бүкіл әлемді қамтыған күрделі ахуалға назар аударып, осындай қиын жағдайда біздің елімізде әлеуметтік-экономикалық тұрақтылықты сақтауға, жұмыспен қамтуға және халықтың табыс деңгейін қамтамасыз етуге зор көңіл бөлінді. Осы ретте, Нұрлан Нығматулин: Дағдарысқа қарсы жедел шаралар шеңберінде кірістерін уақытша жоғалтқан 4,5 миллионнан астам қазақстандық ай сайынғы өтеусіз мемлекеттік көмек алды. Бұл мақсатқа 450 миллиардтан астам теңге жұмсалды. Осы күрделі кезеңде біздің Тұңғыш Президентіміз бұрынғыдай барша қазақстандықтар бірлігінің кепіліне айналғанын ерекше атап өткім келеді, - деді. Елбасымыздың бастамасымен «Birgemiz» атты ұлттық қайырымдық қор ұйымдастырылып, жалпыхалықтық қозғалыс барлық қазақстандықтарды бір мақсатқа жұмылдырды. Сонымен қатар, қордың біржолғы қайырымдылық қаржылай қолдауына 550 мыңнан астам қазақстандық отбасы ие болды. Миллионнан астам адам азық-түлік және тұрмыстық көмекпен қамтылып, мыңдаған еріктілер мұқтаж жандарға жәрдемдесті. Өз кезегінде коронавирустың таралуына қарсы тұру және төтенше жағдай кезінде тұрақтылықты қамтамасыз ету жолында Елбасының бастамасына Мәжіліс депутаттарының бірауыздан қолдау білгіргенін айтқан Палата Спикері Нұрлан Нығматулин: Бүгінде Мемлекет Басшысы Қасым-Жомарт Тоқаевтың экономикалық өсімді қалпына келтіру жөніндегі бастамасы заңнамалық қолдауға ие болып отыр. Өздеріңізге белгілі, ағымдағы жылдың наурыз айынан бері Парламент ерекше жағдайда жұмыс істеуде. Төтенше жағдай кезінде Парламентте басқарушылық шешімдер қабылдаудың жаңа үлгісі қолданыла бастады. Ол заң жобаларын қашықтықтан талқылау жүйесі. Біз үшін барлық мүдделі тараптардың, депутаттардың, мемлекеттік органдар мен азаматтық қоғамның үздіксіз қашықтықтан жұмыс істеуін қамтамасыз ететін бейне байланыс, селекторлық кеңестер және басқа да заманауи ақпараттық технологиялар мүмкіндігін барынша пайдалану маңызды болды. Ерекше айту керек, заң жобаларын мақұлдаудың қарқыны мен сапасы төмендеген жоқ. Өз уақытында жедел әрі тиімді шешімдер қабылданды. Сонымен қатар, конференцияда Мәжіліс Төрағасы ең алдымен депутаттар ұлттық экономика, ауыл шаруашылығы, халықты әлеуметтік қолдау, денсаулық сақтау саласындағы жүйелі шаралар, эпидемиологиялық жағдайды тұрақтандыру, білім берудің барлық деңгейлерінің сапасы мәселелерін ерекше бақылауға алғанын жеткізді. Сондай-ақ, Палата Спикері Нұрлан Нығматулин бүгінде елімізде экономикалық өсімді қалпына келтіру, шағын және орта бизнесті қолдау, халықтың әлеуметтік әл-ауқатын нығайту бойынша жұмыстар белсенді жүргізіліп жатқанына назар аударды.

29.10.2020

Мәжіліс депутаты Грузиядағы Парламент сайлауын байқауға қатысады

Нұр-Сұлтан, 29 қазан, Мәжіліс үйі. Мәжілістің Халықаралық істер, қорғаныс және қауіпсіздік комитетінің төрағасы Мұхтар Ерман ағымдағы жылдың 31 қазанында Грузияда өтетін парламенттік сайлауды бақылауға қатысады. Мәжіліс депутаты ЕҚЫҰ Парламенттік Ассамблеясының бақылаушылар миссиясының құрамында Грузия Парламентінің сайлауына мониторинг жүргізеді.

15.10.2020

Мәжіліс депутаттары қытайлық әріптестерімен онлайн кездесу өткізді

Нұр-Сұлтан, 15 қазан, Мәжіліс Үйі. Бүгін Мәжіліс Төрағасының орынбасары Гүлмира Исимбаева Бүкілқытайлық халық өкілдері жиналысы Тұрақты комитеті төрағасының орынбасары Ван Чэнмен онлайн-кездесу өткізді. Тараптар әңгімелесу барысында екіжақты ынтымақтастықтың, халықаралық ұйымдардағы өзара іс-қимылдың және өңірдегі қазіргі ахуалдың кең ауқымды мәселелері бойынша пікір алмасты. Сондай-ақ 2022 жылы 30 жылдығы атап өтілетін екіжақты қарым-қатынастардың қарқынды және үдемелі дамуы туралы айтты. Мәжіліс Төрағасының орынбасары Нұр-Сұлтан мен Бейжің арасында дипломатиялық қарым-қатынас орнаған 28 жыл ішінде қарқынды саяси диалог пен терең экономикалық байланыстар орнап, жан-жақты өзара іс-қимыл серпінді дамып келе жатқанына тоқталды. Гүлмира Исимбаева әңгімелесу барысында бұл екі елдің кешбасшыларының еңбегі екенін, Қазақстан-Қытай қарым-қатынастарының қалыптасуы мен нығаюында Қазақстанның Тұңғыш Президенті, Елбасы Нұрсұлтан Назарбаевтың ерекше рөлін атап өтті. Ал Мемлекет Басшысы Қасым-Жомарт Тоқаевтың сапары және сол ресми сапар барысында бірлескен мәлімдемеге қол қойылуы Қазақстан-Қытай қатынастарының жаңа дәуірінің басталуы екеніне назар аударды. Өз кезегінде Қытай Парламентінің өкілі Қазақстанмен екіжақты ынтымақтастықты одан әрі нығайтуға үлкен қызығушылық танытып, оларды қазіргі заманғы халықаралық қатынастардағы достық пен тату көршіліктің эталоны деп атады. Экономикалық өзара іс-қимыл туралы әңгіме барысында тараптар ҚХР-ның «Бір белдеу – бір жол» бастамасына және Қазақстан Республикасының Тұңғыш Президенті Нұрсұлтан Назарбаевтың «Нұрлы жол» бағдарламасына үлкен көңіл бөлінетінін мәлімдеді. Бұдан басқа отырыста коронавирустық инфекция пандемиясының теріс салдарын азайту бойынша тәжірибе алмасу үшін екі елдің күш-жігерін үйлестірудің маңыздылығы атап өтілді. Осыған байланысты Қытай вице-спикері Қазақстанның елдегі эпидемиялық жағдайдың шиеленісуі кезеңінде көрсеткен көмегі үшін алғыс айтып, COVID-19 індетіне қарсы жаңа екпе әзірлеп, оны сынамадан өткізгені туралы хабарлады. Өз кезегінде Гүлмира Исимбаева Қытай дәрігерлеріне консультативтік және тәжірибелік көмек көрсеткені үшін ризашылығын білдірді. Сонымен қатар, тараптар экономиканы цифрландыру, жасанды интеллект, ауыл шаруашылығы, денсаулық сақтау, көлік және басқа да салалардағы ынтымақтастықты одан әрі кеңейту қажеттігін атап өтті. Әңгімелесу барысында екі елдің заң шығарушы органдарының сындарлы және серпінді диалог ісіндегі маңызды рөлі атап өтілді. Кездесуге Мәжіліс депутаттары Мұхтар Ерман мен Қуаныш Сұлтанов қатысты.

08.09.2020

Н.Нығматулин бейнеконференция режимінде АСЕАН ПАА отырысында сөз сөйледі

Нұр-Сұлтан, 8 қыркүйек, Мәжіліс үйі. Мәжіліс Төрағасы Нұрлан Нығматулин Оңтүстік-Шығыс Азия елдері қауымдастығының Парламентаралық Ассамблеясының 41-ші Бас Ассамблеясына (АСЕАН ПАА) қатысты. Бұл ауқымды форум осы жылы бейнеконференция режимінде өтті. АСЕАН ПАА Бас Ассамблеясының пленарлық отырысында сөз сөйлеген Мәжіліс Спикері әлемдік жеткізу тізбектерін қалпына келтірудің, қазіргідей күрделі геосаяси жағдайларда көлік-логистикалық бағыттардың ашықтығы мен қауіпсіздігін қамтамасыз етудің маңыздылығын атап өтті. - Осы орайда Елбасы Нұрсұлтан Әбішұлы Назарбаевтың бүкіл Еуразия құрлығында серіктестік құру туралы Үлкен Еуразия стратегиялық идеясы ерекше өзекті болып отыр. Сауда-экономикалық және инвестициялық ынтымақтастықты тереңдету үшін Еуразиялық экономикалық одақ желісі бойынша АСЕАН-мен өзара іс-әрекетті дамыту әлеуетті болып табылады, - деді Нұрлан Нығматулин. Мәжіліс Төрағасының айтуынша, осы форматтағы экономикалық байланыстарды нығайту континент елдерінің дамуына, экономикалық өсуіне және азаматтардың әл-ауқатының артуына қуатты серпін бере алады. 670 миллионға жуық халқы бар АСЕАН, жалпы ішкі өнімі 3,5 трлн. АҚШ долларын және сыртқы сауда айналымы 4,5 трлн. АҚШ долларын құрайтын ең ірі аймақтық ұйымдардың бірі. Мемлекет Басшысы Қасым-Жомарт Тоқаев аймақтағы халықаралық ұйымдармен ынтымақтастықты дамытуға ерекше мән беретінін айтқан Нұрлан Нығматулин Оңтүстік-Шығыс Азия елдерімен қарым-қатынасты нығайту және АСЕАН-мен байланысты кеңейтуді Қазақстанның сыртқы саясатының басым бағыттарының бірі деп атады. Сонымен қатар, Мәжіліс Төрағасы парламенттік дипломатияның халықаралық ынтымақтастықтың тиімді тетіктерін құруда және аймақтық және континентальды деңгейлерде ортақ шешімдер табуда айтарлықтай әлеуетке ие екендігіне сенім білдірді. Айта кету керек, АСЕАН ПАА 41-ші Бас Ассамблеясының отырысы Ханой қаласында ұйымдастырылды, оның қазіргі президенті Вьетнам Ұлттық Ассамблеясының Төрағасы. Сондай-ақ, күн тәртібіне сәйкес бейбітшілік пен қауіпсіздікті қамтамасыз ету, Парламенттің COVID-19-дан кейін аймақтағы ынтымақтастық пен экономиканы қалпына келтірудегі рөлі, жұмысшы әйелдер үшін жұмыс пен кірісті қамтамасыз етуде Парламенттегі әйелдердің рөлін арттыру, ПАА АСЕАН жас Парламент өкілдерінің бейресми кездесуі туралы мәселелер қаралды.

15.06.2020

Н.Нығматулин ҰҚШҰ Парламенттік Ассамблеясының отырысында сөз сөйледі

Нұр-Сұлтан, 15 маусым, Мәжіліс үйі. Мәжіліс Төрағасы Нұрлан Нығматулин Ұжымдық қауіпсіздік туралы шарт ұйымы Парламенттік Ассамблеясы Кеңесінің отырысына видеоконференция режимінде қатысты. Кеңестің кезекті көшпелі отырысы Душанбеде өтуі керек болатын. Алайда, коронавирус індетіне байланысты күн тәртібіндегі мәселелер бейнеконференция режимінде талқыланды. Отырысқа Армения, Беларусь, Қазақстан, Қырғызстан, Ресей және Тәжікстанның Парламент спикерлері, сондай-ақ, Сербия мен Ауғанстан Парламентінен ҰҚШҰ ПА бақылаушылары қатысты. Қатысушылар Парламенттік Ассамблеяның 2021–2025 жылдарға арналған іс-шаралар бағдарламасының жобасын қарады. Отырыста сөз сөйлеген Мәжіліс Төрағасы Нұрлан Нығматулин құжат нормативтік-құқықтық базаны кеңейтуге және ғылыми-әдістемелік қамтамасыз етуді жетілдіруге бағытталған көптеген тақырыптар мен бағыттарды қамтитынын атап өтті. Бағдарлама жобасы ҰҚШҰ ПА тұрақты комитеттерінде және ұлттық парламенттерде қаралады. - Модельдік заңнаманы әзірлеу кезінде Ұжымдық қауіпсіздік туралы шарт ұйымының ұстанымдары мен мақсаттарын және ҰҚШҰ Жарғысын басшылыққа алып, сондай-ақ, Ұйымға мүше мемлекеттердің ұлттық заңнамаларын ескеру қажет, - деді Нұрлан Нығматулин. Сонымен қатар, жиынға қатысушыларға ҰҚШҰ Ұжымдық қауіпсіздік кеңесінің күзгі сессиясының қорытындылары, Ұйымның жауапкершілік аясындағы ахуалы, ұжымдық қауіпсіздікке төнетін қатерлер мен қауіптерге қарсы іс-шаралар және ҰҚШҰ аясында жасалған халықаралық шарттарды ратификациялау туралы ақпарат берілді.

06.03.2020

Мәжіліс депутаттары ТМД Парламентаралық Ассамблеясының Санкт-Петербордағы тұрақты комиссиясының отырысына қатысты

Нұр-Сұлтан, 6 наурыз. Мәжіліс үйі. Санкт-Петербордағы Таврия сарайында ТМД Парламентаралық Ассамблеясының Саяси мәселелер және халықаралық ынтымақтастық жөніндегі тұрақты комиссиясының отырысы өтті. Отырыста Мәжілістің Халықаралық істер, қорғаныс және қауіпсіздік комитетінің Төрағасы М. Ерман ПАА-ның саяси мәселелер және халықаралық ынтымақтастық жөніндегі тұрақты комиссиясының төрағасы болып сайланса, Р. Рубинян, Т.Думбадзе және К. Косачев орынбасарлары болып сайланды. Іс-шарада қатысушылар Өзбекстанның Тәуелсіз Мемлекеттер Достастығына 2020 жылы төрағалық ету Тұжырымдамасы туралы мәселені қарады. Талқылаудың тағы бір тақырыбы – халықаралық парламенттік ұйымдар сессияларының нәтижелері және аталған ұйымдардың жұмысында ТМД-ға мүше мемлекеттердің парламенттік делегацияларының әрекеттерін үйлестіру туралы болды. Сонымен қатар, қатысушылар назарына ТМД Сыртқы істер министрлері кеңесі отырысының нәтижелері (2019 жылғы 10 қазан, Ашхабад) және 2020 жылдың 3 сәуірінде ТМД сыртқы істер министрлерінің кеңесінде қарауға ұсынылған мәселелер туралы (Алматы, Қазақстан Республикасы) баяндама комиссия мүшелеріне ұсынылды. Сондай-ақ, Комиссия мүшелері Санкт-Петербург мемлекеттік университетінің халықаралық қатынастар факультетінің әлемдік саясат кафедрасының профессоры Н. Васильевтің Біріккен Ұлттар Ұйымының Қауіпсіздік Кеңесін реформалау перспективалары туралы баяндамасын тыңдады. Отырысқа қатысушыларға Тәуелсіз Мемлекеттер Достастығына қатысушы мемлекеттердің Парламентаралық Ассамблеясының байқаушылар тобының сайлауға бақылау жүргізуге қатысуы туралы қорытындылары ұсынылды. Атап айтқанда, 2019 жылғы 22 желтоқсанда өткен Өзбекстан Республикасының Олий Мажлисі Заңнамалық палатасы, 2020 жылғы 9 ақпанда Әзербайжан Республикасы Милли Меджлисі және 2020 жылғы 1 наурызында өткен Тәжікстан Республикасының намояндагон маджлиси оли (парламенттің төменгі палатасы). Іс-шараның нәтижесі бойынша отырысқа қатысушылар комиссияның 2019 жылғы жұмысын қорытындылады.

21.01.2019

Н. Нығматулин Қырғызстан елшісін қабылдады

Астана, 21 қаңтар, Мәжіліс үйі. Мәжіліс Төрағасы Нұрлан Нығматулин Қырғызстанның Қазақстандағы Төтенше және Өкілетті елшісі Жээнбек Кулубаевты қабылдады. Тараптар екі ел арасындағы ынтымақтастықты дамытудың өзекті сұрақтарын талқылады. Мәжіліс Спикерінің пікірінше, біздің елдеріміз Президенттері Нұрсұлтан Назарбаев пен Сооронбай Жээнбековтің өзара түсіністік пен достыққа негізделген, бірлескен жұмыстарының нәтижесінде бүгінде екіжақты және көп қырлы ықпалдастықты нығайтудың жоғарғы көрсеткіштеріне қол жеткізілді. Алдағы уақытта да Қазақстан үшін бауырластық, стратегиялық әріптестікті одан әрі тереңдету маңызды болып қала бермек. Осы ретте Н. Нығматулин екі ел ратификациялаған қазақ-қырғыз мемлекеттік шекарасын шегендеу туралы Шарт өзара сенім мен татукөршілік қатынасты нығайтуға жол ашатынын атап өтті. Өз кезегінде Қырғыз елшісі қос мемлекет Көшбасшыларының сындарлы саясатының арқасында елдеріміз арасындағы байланыс басқа елдерге үлгі боларлық деңгейде дамып келе жатқанын, болашақта да Қазақстан мен Қырғызстан арасындағы ынтымақтастық әлеуетінің зор екенін айтты. Одан әрі тараптар, барлық бағытта, соның ішінде, парламентаралық қарым-қатынасты күшейтудің маңыздылығына тоқталды. Кездесу барысында Палата Спикері Қазақстан Президентінің еуразиялық идеясының 25 жылдығына орай Астанада, қыркүйекте Еуропа және Азия елдері парламенттері спикерлерінің Төртінші кеңесі өтетінін айтып, оған қатысуға қырғыздық әріптестерін де шақырды. Н. Нығматулин жаңадан қызметіне кіріскен елшіге депутаттық корпус атынан табыс тіледі.

08.11.2018

Мәжіліске Вестминстер қорының делегациясы келді

Астана, 8 қараша, Мәжіліс үйі. Бүгін Мәжіліске Демократияны қолдау бойынша Лондондағы Вестминстер қорының делегациясы келді. Басқару мәселелері жөніндегі аға кеңесші Франклин де Вриз басқарған делегация өкілдерін Мәжілістің Халықаралық істер, қорғаныс және қауіпсіздік комитетінің Төрағасы Мұхтар Ерман қабылдады. Тараптар әңгімесу барысында екі ел арасындағы байланыстың нығайып, көпжақты әріптестіктің орнағанына назар аударды. Сонымен қатар, кездесуде Вестминстер қорының қызметі, парламентаризм, Қазақстан Республикасы Парламентінің заң шығару қызметінің тәжірибесі мен заң жобаларын қарау кезіндегі жұмыста қоғамдық-саяси бірлестіктер мен үкіметтік емес ұйымдар өкілдерінің қатысуы және басқа да бірқатар мәселелер туралы айтты. Сондай-ақ, тараптар серіктестік пен ынтымақтастықты одан әрі дамыту қажеттілігіне назар аударды.

07.11.2018

Мәжіліске америкалық дипломат келді

Астана, 7 қараша, Мәжіліс үйі. Бүгін Мәжілістің Халықаралық істер, қорғаныс және қауіпсіздік комитетінің төрағасы Мұхтар Ерман мен Қазақстан Республикасындағы Америка Құрама Штаттарының Уақытша сенімді өкілімен Теодор Лингпен кездесті. Әңгімелесу барысында Қазақстан мен Америка арасындағы маңызды мәселелер талқыланып, ерекше назар Қазақстан Республикасының Президенті Н.Ә. Назарбаевтың ағымдағы жылдың қаңтар айында АҚШ-қа ресми сапарының қорытындысы бойынша екі ел арасында жүзеге асқан белсенді жұмыстар туралы айтылды. Сонымен қатар, тараптар парламентаралық байланыстарды арттыруға назар аударды.

06.11.2018

Мәжіліс Төрағасы Н. Нығматулин Эстонияның Премьер- Министрі Ю. Ратаспен кездесті

Астана. 6-қараша, Мәжіліс үйі. Бүгін Парламент Мәжілісінің Төрағасы Нұрлан Нығматулин Эстонияның Премьер-Министрі Юри Ратас бастаған делегация өкілдерімен кездесті. Тараптар екіжақты қарым-қатынасты нығайтудың өзекті сұрақтарын талқылады. Мәжіліс Төрағасы Эстония Қазақстанның Балтық аймағындағы маңызды әріптесі екенін алға тарта келіп, өткен жылы екі ел арасында дипломатиялық қатынастың орнағанына 25 жыл толғанын атап өтті. Біздің еліміз аталған мемлекетпен жан-жақты әрі сындарлы диалогты одан әрі дамытуға ынталы. Мәжіліс Төрағасы әсіресе, Қазақстан Президенті Нұрсұлтан Назарбаевтың бастамасымен жүзеге асырылып жатқан «Цифрлы Қазақстан» бағдарламасына айрықша тоқталды. Осы ретте Эстонияның цифрландыру, ақпараттық-коммуникациялық технология саласындағы жетістіктерін сөз еткен Н. Нығматулин осы бағытта жан-жақты, соның ішінде, заңнамалық деңгейде тәжірибе алмасудың маңыздылығына ерекше көңіл бөлді. Өз кезегінде Эстония Премьер – Министрі Қазақстанның, соның ішінде, Астананың даму қарқынына таңданысын жасырмады. Сондай-ақ, біздің елдеріміздің өзара іс-қимылы табысты дамып келе жатқанын айта келіп, екіжақты қатынасты одан әрі нығайтудың әлеуеті зор екеніне тоқталды. Одан әрі Палата Спикері Мәжілістің заң шығармашылық жұмысы жайында әңгімелей келіп, парламентаралық байланысты күшейту мәселелеріне тоқталды.

02.10.2017

Н. Нығматулин Жапонияның Қазақстандағы елшісін қабылдады

Астана, 2 қазан, Мәжіліс үйі. Мәжіліс Төрағасы Нұрлан Нығматулин Жапонияның Қазақстандағы Төтенше және Өкілетті елшісі Итиро Кавабатаны қабылдады. Қос тараптың алғашқы ресми кездесуінде екіжақты қарым-қатынасты одан әрі тереңдетудің өзекті мәселелері талқыланды. Тараптар биыл екі ел арасында дипломатиялық байланыстың орнағанына 25 жыл толғанына айрықша назар аудара келіп, осы уақыттар ішінде жеткен жетістіктерді одан әрі еселей түсудің маңыздылығына назар аударды. Н. Нығматулин атап өткендей, Қазақстан Президенті Нұрсұлтан Назарбаев пен Жапония Премьер-министрі Синдзо Абэ арасындағы достық қатынастың арқасында екі ел арасындағы ынтымақтастық бүгінгі күні барлық салада кеңейтілген стратегиялық әріптестік деңгейіне жетті. Сонымен бірге, біздің елдеріміз ядролық қарусыздану және таратпау, атом энергиясын бейбіт мақсатқа пайдалану, тұрақты даму бағытында өте жақын серіктестер. Мәжіліс Төрағасының пікірінше, екіжақты ынтымақтастықты дамытуда парламенттік дипломатияның өзіндік орны бар. Осы ретте Мәжіліс Спикері біздің еліміз ең дамыған 30 елдің қатарына кіру мақсатын қойғанын, оған жетуде алдыңға қатарлы мемлекеттер тәжірибесінің маңыздылығын алға тарта келіп, бұл жолда 70 жылдық тарихы бар жапондық парламентаризмнің ықпалы айрықша екенін атап өтті. Елші өз қызметінің былтыр Қазақстан тәуелсіздігінің 25 жылдығында басталып, биыл қос мемлекет арасындағы дипломатияның мерейтойлық маңызды кезеңімен жалғасып жатқанын, әрқашанда елдер арасындағы достық әрі әріптестік ықпалдастықты күшейтуге дайын екенін жеткізді. Кездесу иелері ЭКСПО көрмесі төңірегіндегі қорытынды ой-пікірлерін де назардан тыс қалдырмады.

22.09.2017

Қазақстан-Вьетнам: екі ел арасындағы парламенттік байланыстар туралы баяндалды

Астана, 22 қыркүйек, Мәжіліс үйі. Бүгін Парламентте Мәжілістің Халықаралық істер, қорғаныс және қауіпсіздік комитетінің Төрағасы Мәулен Әшімбаев пен Вьетнам Социалистік Республикасының Қазақстандағы Төтенше және Өкілетті Елшісі Доан Тхи Суан Хйенмен кездесу өтті. Әңгімелесу барысында екі жақты қатынастарды, соның ішінде парламентаралық байланыстарды одан әрі дамыту мәселелері талқыланды.

22.09.2017

Қазақстан-ГФР: парламентаралық байланыс

Астана, 22 қыркүйек, Мәжіліс үйі. Бүгін Парламентте Мәжілістің Халықаралық істер, қорғаныс және қауіпсіздік комитетінің Төрағасы М. Әшімбаев пен Германия Федеративтік Республикасының Қазақстан Республикасындағы Төтенше және Өкілетті Елшісі Рольф Мафаэльдің кездесуі өтті. Сұхбаттасу барысында екіжақты ынтымақтастықты одан әрі кеңейту, екі ел басшыларының рөлі, Астанадағы EXPO-2017 көрмесінің табысты өткізілуінің маңыздылығы мен оның ішінде неміс павильонының танымалдылығы туралы талқыланды. М.Әшімбаев алда тұрған жоспарлар туралы айта келе, басқа бағыттармен қатар энергия үнемдеу саласына да тоқталды, ал өз кезегінде неміс дипломаты мысал ретінде қазақ және неміс техникалық университеттерінің ынтымақтастығына сілтеме жасай отырып, ғылымға қызығушылықтың артуына назар аударды. Әңгіме барысы сондай-ақ, Қазақстандағы конституциялық реформа, Германиядағы алдағы уақытта өтетін парламенттік сайлау және Қазақстан мен Еуропалық Одақ арасындағы ынтымақтастық мәселелері туралы өрбіді. Екі ел өкілдерінің кездесуінде радикализм, лаңкестік пен қауіпсіздіктің алдын алу мәселелеріне ерекше көңіл бөлінді. Тараптар осы мәселелерді ілгерілетуде парламенттік қарым-қатынастың маңызды рөл атқаратына тоқталды. Шара соңында екі жақ парламентаралық байланыстар одан әрі дамитынына сенім білдірілді.

19.09.2017

«Нұр Отан» - ХДПАФ: Мәжілістегі кездесу

Астана, 19 қыркүйек, Мәжіліс үйі. Бүгін Қазақстан Парламентіне Халықтың қоныстануы және дамуы жөніндегі парламентарийлердің Азиялық Форумының төрағасы, Жапония Парламенті кеңесшілер палатасының депутаты Кейдзо Такеми келді. Мәжілісте «Нұр Отан» партиясы фракциясының Әлеуметтік кеңесі мүшелерімен кездесуі өтті. Мәжілістің вице-спикері, фракция жетекшісі Гүлмира Исимбаева отырысты ашу барысында Халықтың қоныстануы және дамуы жөніндегі парламентарийлердің Азиялық Форумы (ХДПАФ) айналысатын халықтың қоныстануы және дамуы БҰҰ-ның орнықты даму мақсаттарының басым бағыттарының бірі екенін атап өтті. Өз кезегінде, Такеми мырза гендерлік теңдік және әйелдердің құқықтары мен мүмкіндіктерін кеңейту, жастарға инвестиция салу саласындағы Халықтың қоныстануы және дамуы жөніндегі парламентарийлердің Азиялық Форумының қызметі туралы хабардар етті. Отырыста Әлеуметтік Кеңестің қызметі туралы ақпарат берілді. БҰҰ-ға мүше мемлекеттер қабылдаған Қазақстанның орнықты даму мақсаттарына қол жеткізу жөніндегі жұмыста депутаттық корпустың рөлі ерекше атап өтілді. Парламентшілердің арасындағы халықты қоныстандыру мен дамуға қатысты тәжірибе алмасуда, денсаулық сақтау және әйелдердің құқығын қорғауда, жастарды қолдау және ұзақ өмір сүрудің жалпы стратегиясын әзірлеуде үнқатысуды дамытудың маңызды алаңы болып табылатын, ХДПАФ жұмысына Қазақстан белсенді түрде қатысады. Кездесуге салауатты өмір салтын, интеграция және егде жастағы адамдардың қоғамға араласуы, өмір сүру сапасын жақсарту үшін қажетті жағдайлар жасау мәселелеріне үлкен қызығушылық танытты. Кездесу қорытындысы бойынша мазмұнды пікір-алмасулар орнап, әлеуметтік саясаттың тиімділігін арттыру бойынша тәжірибелік ұсынымдар талқыланды. Айта кетейік, ХДПАФ 1981 жылы БҰҰ-ның халықты қолдау қорының бастамасымен құрылды. Форум халықаралық үкіметтік емес ұйым болып табылады. Негізгі мақсаттары - Азиядағы халықтың тұрмыс деңгейі мен әл-ауқатын жақсарту жөніндегі бастамаларды насихаттау, халықты қоныстандыру аумағындағы бағдарламаға депутаттардың назарын аудару.

18.09.2017

Мәжіліс Төрағасы Н. Нығматулин К. Такеми мырзаны қабылдады

Астана, 18 қыркүйек, Мәжіліс үйі. Мәжіліс Төрағасы Нұрлан Нығматулин Халықтың қоныстануы және дамуы жөніндегі парламентарийлердің Азиялық Форумының төрағасы К. Такеми мырзаны қабылдады. Н. Нығматулин атап өткендей, Жапониямен жан-жақты қатынасты дамыту Қазақстанның сыртқы саясатындағы маңызды басымдықтардың бірі. Биыл екі ел арасында дипломатиялық қатынастың орнағанына 25 жыл толды. Осы уақыттар ішінде Астана мен Токио бір-біріне тығыз қолдау көрсете отырып, ортақ мақсаттар жолында сенімді әріптестер болып келеді. Мәжіліс Төрағасының айтуынша ядролық қарусыздану және таратпау, атом энергиясын бейбіт мақсатта пайдалану басқа да халықаралық өзекті мәселелер бойынша біздің елдеріміздің ұстанымы өте жақын. Палата Спикері Қазақстан Президенті Нұрсұлтан Назарбаевтың өткен жылғы Жапонияға ресми сапары бұған дейін қол жеткізілген келісімдерді бекітіп, екі ел арасындағы ынтымақтастықты кеңейтілген стратегиялық әріптестік деңгейіне жеткізгенін атап өтті. Өз кезегінде мәртебелі мейман Жапонияда Қазақстан Президентінің ядролық қаруды таратпау жөніндегі бастамаларын жоғары бағалайтынын және Президенттің халықаралық деңгейдегі өзекті мәселелер бойынша маңызды қадамдарына алғысын білдірді. Н. Нығматулин халықтың қоныстануы және дамуы мәселесі бойынша парламентшілердің жұмысын ынталандыру мен алға жылжыту бойынша форумның ауқымды жұмыстар атқарып келе жатқанын алға тарта келіп, біздің депутаттардың алдағы уақытта да ХДПАФ аясында әріптестермен белсенді іс-қимыл жасауға дайын екендігін білдірді. Кездесу барысында тараптар барлық бағыт бойынша байланысты тереңдету жайын сөз етіп, соның ішінде, «Нұр Отан» парламенттік фракциясы және Либералды-демократиялық партиясы, бейінді комитеттер мен ынтымақтастық жөніндегі парламентаралық топтар арқылы парламентаралық әріптестікті нығайтудың қажеттілігін атап өтті. Мәжіліс Төрағасы К. Такеми мырзаның сапары біздің елдеріміздің екіжақты қарым-қатынасын одан әрі тереңдетуге ықпал ететініне сенім білдірді.

11.09.2017

Н. Нығматулин Босния және Герцеговина Президенттігі Президиумының Төрағасы Б. Изетбеговичпен кездесті.

Астана, 11 қыркүйек, Мәжіліс үйі. Мәжіліс Төрағасы Нұрлан Нығматулин Ислам ынтымақтастығы ұйымының ғылым және технологиялар жөніндегі саммиті барысында Босния және Герцеговина Президенттігі Президиумының Төрағасы Б. Изетбеговичпен кездесті. Мәжіліс Спикері екі ел арасында дипломатиялық қатынастың орнағанына 20 жыл толған және Ислам ынтымақтастығы ұйымының Саммиті аясында өтіп жатқан кездесудің маңыздылығына тоқтала келіп, мәртебелі мейманның бұл жолғы сапары өзара ынтымақтастықты тереңдетуге ықпал ететінін атап өтті. Босния және Герцеговина Қазақстанның Балқан аймағындағы маңызды әріптесі болып табылады. Н. Нығматулин Қазақстан Президенті Нұрсұлтан Назарбаевтың тәуелсіздік алған күннен бастап, Азия елдерімен, соның ішінде, Ислам ынтымақтастық ұйымы аясында ықпалдастықты күшейтуге ерекше назар аударып келе жатқанын айтты. 21 ғасырдағы технологиялық жаңалықтар, білім және инновациялық ғылым жарқын болашақтың кепілі. Сол үшін Қазақстан Президенті аталған Саммитті өткізу туралы бастама көтергенін алға тартқан Мәжіліс Төрағасы маңызды шара ИЫҰ мүше-мемлекеттердің тамырластығын тереңдетуге тың серпін беретін болады деді. Өз кезегінде Б. Изетбегович Қазақстанның технологиялық жоғары жетістіктері қызықтыратынын және екі ел арасындағы әріптестікті нығайтуға аса мүдделі екенін жеткізді. Тараптар халықаралық және парламентаралық ынтымақтастық жайына да баса көңіл бөліп, заңнамалық тәжірибе алмасу жайын сөз етті.

06.09.2017

Н. Нығматулин Польша Президенті А. Дудамен кездесті

Астана, 6 қыркүйек, Мәжіліс үйі. Мәжіліс Төрағасы Нұрлан Нығматулин бүгін Польша Президенті Анджей Дудамен кездесті. Мәртебелі мейман біздің елімізге Елбасының арнайы шақыруымен келді. Мәжіліс Спикері атап өткендей, Польша Президентінің бұл жолғы сапары өзара ынтымақтастықты тереңдетуге тың серпін беретін болады. Польша Қазақстанның Орталық және Шығыс Еуропадағы маңызды саяси және экономикалық әріптесі болып табылады. Биыл екі ел арасында дипломатиялық қарым-қатынастың орнағанына 25 жыл толды. Осы уақыттар аралығында қос мемлекет арасында сындарлы байланыс орнап, ол жыл сайын тереңдеп келеді. Н. Нығматулин Қазақстан Президенті Нұрсұлтан Назарбаевтың өткен жылғы Польша еліне ресми сапары мемлекеттер арасындағы сауда-экономикалық байланысты нығайтуға ықпал еткенін алға тарта келіп, экономикалық ынтымақтастық туралы қабылданған президенттер Декларациясының нәтижесінде 845 млн. АҚШ долларын құрайтын 15 инвестициялық жобаға қол қойылғанын атап өтті. Тараптар барлық салада ықпалдастықты күшейту жолдарын әңгімелей келіп, әсіресе, қос мемлекеттің транзиттік мүмкіндігіне айрықша назар аударды. Кездесу барысында ЭКСПО халықаралық көрмесінің маңызына да ерекше көңіл бөлінді. Ал парламентаралық ынтымақтастық жайына келгенде Н. Нығматулин қазақстандық Парламент өкілдері екі мемлекет президенттері арасында қол жеткізілген барлық келісімдерді заңдық тұрғыдан қолдауға дайын екендігін жеткізді.

13.06.2017

Н. Нығматулин Грузия Президенті Г. Маргвелашвилимен кездесті

Астана, 13 маусым, Мәжіліс үйі. Мәжіліс Төрағасы Нұрлан Нығматулин Қазастанға ресми сапармен келген Грузия Президенті Гиоргий Маргвелашвилимен кездесті. ЭКСПО көрмесінде Грузия Ұлттық күнінің салтанатты ашылуынан кейін бірден Мәжіліске келген мәртебелі мейманға Н. Нығматулин халықаралық көрмеге көрсеткен қолдауы үшін шынайы алғысын жеткізді. Биыл екі ел арасында дипломатиялық қарым-қатынастың орнағанына 25 жыл толады. Осы уақыттар аралығында қос мемлекет арасында сындарлы байланыс орнап, ол жыл сайын тереңдеп келеді. Мәжіліс Спикері атап өткендей, Грузия Президентінің бұл жолғы сапары өзара ынтымақтастыққа тың серпін беретін болады. Н. Нығматулин Қазақстан Президенті Нұрсұлтан Назарбаев Грузиямен тату көршілік, достық, тарихи тамырластық аясында барлық саладағы ынтымақтастықты тереңдетуге ерекше назар аударатынан алға тарта келіп, саяси, сауда-экономикалық, мәдени-гуманитарлық салалардағы тұрақты даму үдерісін сөз етті. Экономикалық ықпалдастық төңірегінде Палата Төрағасы өткен жылы екі ел арасындағы сыртқы сауда айналымының 41 млн. долларды құрағанын айтып, екі ел әлеуетін ескере отырып, сауда айналымын арттыру қажеттілігіне тоқталды. Сонымен бірге, Мәжіліс Төрағасы Грузияның Аджария мен Маңғыстау облысы арасында тікелей экономикалық байланыстар орнату бастамасының маңыздылығына тоқталып, Мәжіліс екі елдің тиімді ынтымақтастығын тиісті заңнамалық құжаттармен қолдауға дайын екенін білдірді. Өз кезегінде Грузия Президенті Қазақстанға жеткен сәттен бастап көрсетілген қонақжайлылық үшін шексіз ризашылық білдіріп, екі ел арасындағы ынтымақтастықты күшейтудің мүмкіндігі зор екенін атап өтті. Гиоргий Маргвелашвилидің пікірінше, осы жолда парламентаралық әріптестіктің рөлі өте зор. Айта кетейік, Парламент Мәжілісінде депутат М. Айсина жетекшілік ететін Грузиямен ынтымақтастық жөніндегі парламентаралық топ жұмыс істейді.

09.06.2017

Н.Нығматулин мен Сингапур Парламентінің Төрайымы парламентаралық ынтымақтастықты дамытуға келісті

Астана, 9 маусым, Мәжіліс үйі. Бүгін Мәжіліс Төрағасы Нұрлан Нығматулин Сингапур Республикасы Парламентінің Төрайымы Халима Якобпен кездесті. Мәжіліс Спикері екі ел арасындағы байланысты нығайтуда Қазақстан Республикасының Президенті Нұрсұлтан Назарбаев пен Сингапурдың бірінші Премьер-министрі Ли Куан Ю арасындағы жоғары деңгейдегі кездесулері мен жеке қарым-қатынастарының маңызына тоқталды. Сонымен қатар, әңгіме барысында Н.Нығматулин, Сингапур – Қазақстанның Оңтүстік-Шығыс Азия аймағындағы сенімді әріптесі екенін атап кетті. Өз кезегінде, Х.Якоб мемлекет басшылары Н.Назарбаев пен Ли Куан Ю негізін қалаған екіжақты ынтымақтастықтың жалғаса беретіндігіне сенім білдірді. Сингапур Парламентінің Төрайымы, сондай-ақ Қазақстан Республикасы Президентінің «алдымен экономика, содан кейін саясат» атты формуласының тиімділігіне ерекше назар аударды. Сонымен бірге, Сингапур Парламентінің Төрайымы халықаралық ЭКСПО көрмесіне өз елінің ерекше ықыласпен қатысатыны туралы мәлімдеді. - Біз Қазақстанның белсенді түрде дамып келе жатқанын, экономикасының Орталық Азия өңіріндегі қарқынынан хабардармыз, сондықтан да елдеріңіздің біз үшін орны ерекше – деді өз кезегінде Сингапур Парламентінің Төрайымы. Сауда-экономикалық, инвестициялық ынтымақтастық және жаңа технологиялар мен инновация саласындағы өзара екіжақты байланысты ұлғайту мәселелері басты бағыттар қатарында аталды. Х.Якоб, сондай-ақ Сингапур мен ЕурАзЭҚ-тың арасындағы еркін сауда туралы келісімге қол қоюға ниетін білдірді. Бұл, Сингапур Парламенті Төрайымының айтуынша, ынтымақтастықты одан әрі дамыту үшін қосымша тұғырнама ретінде қызмет ететін болады. Н.Нығматулин сингапурлық әріптестерін елімізде өткен Қазақстандағы конституциялық реформа жайынан хабардар етті. Кездесу барысында тараптар екі ел парламентшілерінің арасындағы ынтымақтастықты нығайтуға қызығушылық білдірді. Мәжіліс Төрағасы парламентаралық қарым-қатынастардың кеңейуі мемлекеттік басқару саласындағы заң шығару тәжірибесін алмасуына, инвестиция тартуға, жаңа технологияларды қолдау және дамытуға мүмкіндік беретінін атап өтті.