Қызылорда қаласына қарасты Қарауылтөбе ауылында ат басын тіредік. Мәдениет үйінің маңында тұрғындармен кездесу өткіздік.

Ауылда республикалық бюджет есебінен мәдениет үйі салынып жатыр. Алайда жоба-сметалық құжатта ғимарат дизель отынымен жылытылады деп бекітіліп кеткен. Ауыл ардагерлері нысанның жылыту қазандығын газға ауыстыруды сұрады.

Сонымен қатар, елді мекендегі мектеп те “соляркамен” жылытылады. Оны да газ отынға ауыстыру қажет. «Көгілдір отын» болса, ауылға келіп тұр.

Талап орынды. Дизель отынына қарағанда газбен жылыту әлдеқайда тиімді. Шығын үш-төрт есе аз.

Ең әуелі жоба-сметалық құжатын әзірлеу керек. Содан кейін қаржы бөлу мәселесін бақылауда ұстаймыз.

Бұдан бөлек, тұрғындар жер, дәрігерлік амбулатория салу мәселелерін көтерді.

Ұсыныстарды қағазымызға түртіп алдық. Алдағы уақытта мәселелер қалай шешіліп жатқанын ауыл ақсақалдарына хабарлап отырамыз.