Заң жобаларын Мәжіліс депутаттарына Сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов таныстырды. Ол түзетулердің басым бөлігі Сыбайлас жемқорлыққа қарсы саясат тұжырымдамасын жүзеге асыруға бағытталғанын айтты. Негізгі заң жобасында үш кодекс пен бес заңға өзгерістер мен толықтырулар, Әкімшілік құқық бұзушылық туралы кодекске ілеспе түзетулер енгізіледі. Спикердің айтуынша, түзетулермен ауыр және аса ауыр қылмыстар жасаған сыбайлас жемқорлыққа жол берген лауазымды тұлғалардың мемлекеттік тізілімі енгізіледі, бұл қоғамда сыбайлас жемқорлыққа қарсылық білдіру арқылы қоғамда төзбеушілік туғызуы тиіс. Тағы бір жаңалық – мемлекеттік қызметтегі және квазимемлекеттік сектордағы мүдделер қақтығысын анықтау мен шешуді реттеу. Сонымен қатар, жеке мүдделерін декларациялау, сондай-ақ пара ұсынғаны және уәде еткені үшін қылмыстық жауапкершілік енгізіледі. – Қылмыстық кодексті жаңа 366-1 («Пара алуға келісім беру, пара сұрау немесе талап ету»), 367-1 («Пара ұсыну және уәде ету») баптарымен толықтыру ұсынылады. Пара алу туралы келісімді аяқталған қылмыс деп тану айқын профилактикалық нәтиже береді, бұл мемлекетке зиян келтірмес бұрын пара алуды тоқтатуға мүмкіндік береді, деп түсіндірді Ұлан Сарқұлов. Мемлекет басшысының күнделікті сыбайлас жемқорлықты жою жөніндегі тапсырмаларын іске асыру шеңберінде заң жобаларында мемлекеттік орган, мемлекеттік және мемлекеттік емес ұйым қызметкерінің заңсыз сыйақы алумен байланысты қылмыстарды анықтау жөніндегі жұмыс жетілдіріледі. Сыбайлас жемқорлыққа қарсы шараларды қабылдамағаны үшін жауапкершіліктің құқықтық тетіктері де жетілдірілуде. Сонымен қатар, сыбайлас жемқорлық құқық бұзушылық жасағаны үшін заңды тұлғалардың жауапкершілігі күшейтіледі. Депутаттар баяндамашыға түсіндірме сұрақтарын қойып, заң жобаларын жетілдіру бойынша өз ұсыныстарын білдірді. Түзетулерді бірінші оқылымға дайындау бойынша одан әрі талқылау Мәжіліс депутаты Айдос Сарым бастаған жұмыс тобының отырыстарында өтеді.
________________________________________________________________
Дереккөз: https://www.parlam.kz/ru/mazhilis/news-details/id50956/1/1
Қазақстан Республикасы Парламентінің Мәжілісі
