Мәжіліске Қытай Халық Республикасы Бүкілқытайлық халық өкілдері жиналысының Тұрақты комитеті төрағасының орынбасары Хао Минцзин бастаған делегация келді. Қытайлық әріптестер Қасым-Жомарт Кемелұлы Тоқаевтың басшылығымен Қазақстанның қарқынды экономикалық дамуы, біртұтастық пен қоғамдағы әлеуметтік тұрақтылықтың жоғары деңгейін атап өтті.
Біз ҚХР депутаттарына елімізде жүргізіліп жатқан реформалар жөнінде мәлімет бердік. Бұл «Күшті Президент – ықпалды Парламент – есеп беретін Үкімет» қағидасына сәйкес биліктің барлық тармағын жаңартуға жол ашады. Сондай-ақ Мәжіліс жұмысының нәтижелерімен, алдағы жоспарларымен бөлістік.
Қазақстан мен Қытай қазіргі күрделі жаһандық жағдайларға қарамастан сенімді серіктес, тату көрші болып қала береді. Биыл елдеріміз арасындағы дипломатиялық қарым-қатынастың орнағанына 32 жыл толып отыр. Осы жылдар ішінде біздің екіжақты ынтымақтастығымыз жоғары деңгейге – мәңгілік жан-жақты стратегиялық әріптестікке көтерілді. Бұл - ең алдымен біздің мемлекет басшыларының тынымсыз еңбегінің жемісі. Хао Минцзин мырзамен парламентаралық дипломатия бойынша жұмысты күшейту және тиісті комитеттер мен достық топтары арасындағы байланысты кеңейту жөнінде келісімге келдік.