Астана, 10 мамыр, Мәжіліс үйі. Мәжіліс спикері Ерлан Қошановтың төрағалығымен Палатаның жалпы отырысы өтті. Жиында депутаттар кейбір заңнамалық актілерге жол жүрісін ұйымдастыру мәселелері бойынша өзгерістер мен толықтыруларды қабылдады. Сонымен қатар 1998 жылғы 24 қыркүйектегі Қазақстан Республикасы мен Қасиетті Тақтың арасындағы Өзара қатынастар туралы келісімге Қосымша келісімді ратификациялады.

Мәжілістің Экономикалық реформа және өңірлік даму комитетінің хатшысы Екатерина Смышляева атап өткендей, депутаттар бастамашы болған заң жобасына сәйкес электр самокаттар енді көлік құралы ретінде танылады. Бұл ретте олардың қозғалыс жылдамдығы 25 км/сағ аспауы керек.

«Электрсамокаттар велосипед жолдары мен жол жиектерінде шектеусіз жүре алады. Тротуарларда сағатына 6 километрден аспайтын жылдамдықпен жүруге рұқсат етіледі. Оларға жолдың жүру бөлігінің оң жақ шетімен, соның ішінде  автобус жолағымен бір қатарда жүруіне жол беріледі. Алайда бұл үшін жүргізуші 18 жасқа толуы және шлем киюі шарт. Сондай-ақ үстінде жарық шағылыстыратын киім мен кез келген санаттағы жүргізуші куәлігі болуы қажет. Электрсамокатта жүктер мен жолаушыларды тасымалдауға тыйым салынады және оның жүргізушілері жол қиылыстары мен жаяу жүргіншілер өткелдерінен жаяу өтуі керек», – деді Екатерина Смышляева.

Депутаттар нақтылау үшін тротуарлардағы электрсамокаттардың жылдамдығын шектеуге қатысты сұрақтар қойды. Депутат Арман Қалықов жаяу жүргіншілерге арналған аймақтарда жылдамдықты бақылау камералары, ал самокаттарда тіркеу нөмірлері жоқ болғандықтан, бұл шектеу қалай енгізілетінін, жылдамдықты бұзған жағдайда жүргізушілерге қандай шара қолданылатынын сұрады.

«Тротуарларда арнайы камералар жоқ, дегенмен жылдамдық визуалды түрде көрсетіледі. Бұл – шын мәнінде жаяу жүргіншілер ағынының жылдамдығы. Электрсамокат жылдамдықтан айтарлықтай асып кетсе, ол кез келген бейне жазбада көрінеді. Іс сотқа жетсе, оны оңай дәлелдеуге болады. Сонымен қатар мұндай шектеу самокаттың тежеу ??қашықтығын айтарлықтай азайтуға және уақытында тоқтатуға мүмкіндік береді», – деп жауап берді Е.Смышляева.

Өз кезегінде Ішкі істер министрінің орынбасары Игорь Лепеха түзетулерге сәйкес, электрсамокаттардың жұмысы жаяу жүргіншілер үшін барынша қауіпсіз болуы керектігін айтты. Жаяу жүргіншілер электрсамокат жылдамдығына қарамастан басымдыққа ие. Ішкі істер вице-министрінің айтуынша, әзірге арнайы ереже жоқ, алайда мұндай бұзушылықтар үшін Әкімшілік кодексте 3 АЕК көлемінде айыппұл салу немесе ескерту түрінде жаза қарастырылған. Сонымен қатар электрсамокат жүргізушілеріне жолаушы мен жүк тасымалдауға тыйым салынды, оның жазасы – 5 АЕК көлеміндегі айыппұл.

Сондай-ақ депутаттар 1998 жылғы 24 қыркүйектегі Қазақстан Республикасы мен Қасиетті Тақ арасындағы Өзара қатынастар туралы келісімге Қосымша келісімді ратификациялады. Ішкі істер министрі Марат Ахметжановтың айтуынша, Қазақстандағы Католиктік шіркеу субъектілерінің кез келгенінде қызмет ету үшін ұзақ мерзімге келген дін қызметкерлеріне тұрақты тұруға рұқсат алу рәсімі жеңілдетіледі. Атап айтқанда, төлем қабілеттілігін және тұрғылықты жерін растауға қойылатын талаптар алынып тасталады. Олардың орнына Католик Шіркеуінің жазбаша растауы жеткілікті болады.

 Жалпы отырыс соңында депутаттар жауапты мемлекеттік органдарға өзекті әлеуметтік-экономикалық тақырыптар бойынша бірқатар депутаттық сауал жолдады.

Мәжілістің Баспасөз қызметі – 24-38-22. Фото Ж. Жұмабеков